انا الموضوع دة بعتز بيه جدا
مع ان انا عارفه ان في ناس كتير مش هتقراه
لانه طويل
بس انا قولت لازم بقي انزله
بس ان شاء الله
هيعجبكم
بس يارب الاقي ردود عليه
حلوة وتبقي فيها اراء
**************
قاعد بتسمع عمرو دياب ؟؟
وليا مين انا غير حبيبي ومش حقوله غير يا حبيبي ده اغلي من عنيا ده اللي بتمناه ؟؟
وانت برده شكلك بتسمع عمرو
قالوا ياما ان القمر عالي وبعيد والملايكه مستحيل تلمسها ايد وانا الليلادي كل ده في اديا يمكن اكون في الدنيا دي انا الوحيد
وشايف واحد دموعه في عنيه
بتسمع كاظم الساهر ؟؟
اشكي للزمن رقة احاسيس اشكي لوعتي وصبري واتحدي الندم لو يقدر يعيش لحظة واحده من عمري
واللي بيسمع تامر حسني
حبيبي .. انا قلبي واجعني ... انت عامل فيا ايه انت ساحرلي ولا ايه .. ما كل الناس بتقدر تنسي .. تنسي .. طب انا مش قادر انساك ليه
ارجعلي انا قلبي معاك مش قادر انسي هواك يا حبيبي يا احلي ملاك يا روح الروح
عندي امل كلي امل اشوفك تاني في حضني وايه العمل ايه العمل ارجعلي تاني وخدني
انا تعبان من غيرك اسمعني وراضي ضميرك لو عادي تسيبني لغيرك انا والله اموت
انا تعباااان ... اسمعني .. ااااااااه
ساكت ليه حتعمل ايه يامالك روحي وامري .. شفت حصلي عشانك ايه فرحني لو يوم في عمري
فين ايام ليالينا والفرحة اللي في عنينا لما بنكون لوحدينا ودايبين في غرام
انا تعباتن من غيرك اسمعني وراضي ضميرك لو عادي تسيبني لغيرك انا والله امووووووت
--- معلش انا طولت في اغنيه تامر عشان بقي انا اللي كنت بسمعها ---
المهم اللي عايزه اكلمكم فيه ان كل واحد فينا عايش قصة حب
سواء بنت
سواء ولد
سواء القصه دي متبادله من الطرفين
او من طرف واحد
او من غير طرف خالص واانك عايش في قصة حب مع نفسك كده من غير شخص معين تحبه ودول بقي العالم اللامؤاخذه اللي مخهم مهوي حبتين
حنستثني طبعا الاخوة عديمي الطرف واللي عايشين مع نفسهم ودول لان مشكلتهم مش حتتحل لان مشكلتهم هي نفسهم ومن الاساس دول لا بيحبوا ولا بيعرفوا يحبوا ومعظمهم قلبهم جامد وساعة ما يلاقوا حد يحبهم بجد بيورولوا السواد اللي مشافوش طول عمره ودول عموماً مش موضوعي انهارده
وحيبقالنا نوعين
النوع ابو طرفين
والنوع ابو طرف واحد
نشتغل الاول علي ابو طرف
ونخلي ابو طرفين في الاخر عشان دول شغلانه عايزة شوية كلام وحركات وحتاخد وقت مننا
--------------------
النوع ابو طرف
طبعا دول اغلبيتهم بتوع كاظم يا مستبدة وفؤاد مش حبيبة حد فينا واكيد اكيد هاني شاكر ملك النكد ومصطفي كامل شبورة الغمقان والبرنس الساطع حديثاً في سماء الاغنية الكئيبة تامر عاشور
انا بصراحة معاهم وحاسه بيهم ودول اكتر ناس حساسين في الدنيا
لان اللي يحب حد بدون مقابل ويفضل عايش علي امل بيني وبينكم كده دي اسمي مشاعر ممكن يحس بيها انسان
بس ممكن اخد من وقتك ثواني واستوقف تفكيرك ؟؟
لو انت بتحب بنت وهي مش حاسة بيك صدقني دي مش مشكلة لان بجد لو قدرت انك تثبتلها حبك ده صدقني حتتجاوب معاك وحتحبك واكتر منتا بتحبها او علي الاقل يا سيدي حتشيلك جواها مشاعر جميلة وتفتكرك طول عمرها بس انت حاول ومتتكسفش وريلها انت بتحبها قد ايه .. امشي وراها .. غنيلها ... اقعد قدامها وسبلها ... عيطلها .. اعمل اي حاجه المهم بجد خليها تحس بحبك ده ومتكبتش نفسك
لانك كده صدقني بتخرج نفسك خارج المنافسه
وهو ده اللي انا عايزه اتكلم عنه
المنافسة في الحب
هي قدامها الاختيارات كتير
اللي راكب عربية كويسه وشيك ومريش وجان وجنتل ... ده معاك في المنافسه
الشاب الجدع الشهم ابن البلد اللي حيعرف يصونها ازاي ... برده معاك في المنافسه
المثقف الفاهم المتعلم الطموح اللي ليه مستقبل .... برده معاك في المنافسه
وابن خالتها اللي جاي من الكويت وعامله قرشين وامه عماله تزن علي امها ... برده معاك في المنافسه
وانت كل اللي بتعمله انك سايب نفسك بره دايرة المنافسه وعايش مع نفسك تديها اغاني بليل ودموع واهات
طب منت كده صدقني اوت
خش انت كمان المنافسه بحبك ليها ومشاعرك اللي حاسسها ناحيتها
حبتك او محبتكش مش مهم
المهم انك جوه الدايرة
واحتمال كبير انك انت اللي تكسب
لان البنت بتميل اكتر للي بيحبها ده لو حست فعلاً انك بتحبها مش كلام وبخ وفتح حكاوي وفض مجالس
وصدقني حترتاح اوي لما تقولها علي كل حاجه
اقف قدامها وحط عينك في عنيها وقولها بحبك
وزي ما بقولك دايما
اوعي تسيب نفسك بره المنافسه
خليك جوه الدايرة
خليك جوه الدايرة
خليك جوه الدايرة
لكن طبعا لو البنت اللي انت بتحبها دي بتحب حد تاني .. انسي كل اللي قلتلك عليه .. ولو حسيت لحظة انك قربت حتي من الدايرة انا عايزك تاخد بعضك جري جررررررررررررري
وطبعاً مش حوصيك انه مالوش لازمة تامر عاشور ولا مصطفي كامل والنسيان هو الحل الامثل والاوحد صدقني بالنسبالك
لانك كده خارج المنافسه يعني خارج المنافسه
كده الجزء ابو طرف انا وصلتله اللي انا عايزه علي قد فهمي ويارب يكون فهمه من فهمي
نخش بقي علي ابو طرفين
ودول بقي حكايتهم حكايه
خلصت فيك الكلام --- ادي الملاك البريء --- تملي معاك --- عنيا بتحبك --- الله يباركلي فيك --- سهرني الشوق --- لمستك نسيت الحياه --- اخاف ليه --- في اول الحكايات --- الخ الخ
نمسك الولد الاول
انت طبعا عارف انها بتحبك .. صح ؟؟
بتموت فيك .. بتعشقك .. بتنام علي صوتك وتصحي عليه ومبتقدرش تتصرف في حاجه من غيرك ومبتتخيلش حياتها ثانيه من غيرك
حلو اوي
وطبعا انت بقي ايه مش حتقولي
فارس عصرك واوانك
فاكر نفسك مفيش غيرك انت اتمكنت منها وخلاص علي كده
عملت الشويتين بتوعك
قلتلها اللي عندك
وقعتها فيك
وخلاص حسيت انها ملكك
بيع واشتري بقي يا معلم
اوامر علي الفاضيه والمليانه .. شخط ونطر وزعيق علي اقل حاجه ... اعتراضات واسقاطات ومهاترات ... تختار لبسها تختار شغلها تختار حتي تمشي ازاي
وتقعد تعدل في كل حاجه فيها وتعدل وتعدل
لغايه ما تخليها واحده تانيه غير اللي انت حبتها اساساً وتمشيها عالعجين متلخبطوش
لدرجة اني بستعجب فعلا من اللي بيعملوا كده
لما انت مكنش عاجبك فيها اي حاجه وخلتها تغير نفسها بالصورة دي
انت بقي كنت حبيت فيها ايه من الاول ؟
ولا انت خلاص علشان هي حبتك وبتسمع كلامك سواء مقتنعه بيه او عشان خاطر متزعلكش تقوم تمارس هواية الراجل الشرقي المحببه في تمييل العدل والاعتراض علي كل حاجه وتحسسها انها ساعة ما عرفتها كانت رقاصه وانك انت اللي انتشلتها من الوسط الزباله اللي كانت عايشه فيه
انبي يا شيخ تروح تتنيل
انا عارفه ان السينما والافلام الهابطة بوظتلكم دماغكم
ماهو كل فيلم يطلع البطل بيحب البطله فيه لازم يكون المنافس الوحيد ليه ابن خالتها الاهبل مسخرة الفيلم اللي بنتريق عليه احنا طول الفيلم والبطل هاريله افاه
يا اما يكون البطل امور وكويس بس دمه تقيل وغتيت وماسك شركات ابو البطلة ودايماً يبقي طمعان في الثروة ويطلع حرامي في الاخر ويدخل السجن ويعيش البطل والبطله الطيبين في امان
بس الكلام ده مبيحصلش في الحقيقه خالص علي فكره
في الحقيقه حبيبتك بتروح الجامعه وبتشوف زميلتها اللي حبيبها بيعاملها كويس
في الحقيقه بتروح شغلها وبتشوف الراجل اللي بيحب مراته بجد وبيعاملها كويس وبيثق فيها
في الحقيقه بيكون ليها ابن عم ابن خاله مثق محترم وابن ناس واحسن منك ماديا واجتماعيا وبحكم القرابة وبيحبها وشاريها وحيعاملها احسن معامله وحيراعي ربنا فيها
فبلاش بغباوتك تضيعها من ايدك وتخليها تبص لده او لده او لده ولا حتي تديها مساحة تفكر فيها
سيطر عليها بحبك
حسسها بثقتك فيها
حافظ علي رأيها وكيانها
حاسب علي مشاعرها وحسسها بقربك طمنها عليك وعليها وعلي مستقبلكم
انت ربنا كرمك وخلاك انت لوحدك في قلبها وعقلها في دايرة مقفولة عليك
ليه بتخلي ناس تانيه تخش معاك وتنافسك
والدايرة توسع
والمنافسه تزيد
وبعد ما كنت المنافس والفارس الوحيد
حتبقي بقدرة قادر مطرود من حياتها وحيحل مكانك واحد تاني قدرها بجد وفهمها وبيحبها
اكتر منك بيحبها .. احسن منك بيحبها .. او علي الاقل خالص ولو انت مسيطر عليها اوي .. حبها ليك حيقل وصدقني حيجي يوم وتكرهك
بالنسبه للبنات كلامي مش حيختلف كتير
فكري بنفس المنطق اللي اتكلمت بيه مع الشباب
وشوفي انتي بتعملي ايه صح
وايه غلط
ايه بيحافظ علي حبه ليكي
وايه بيدخل ناس تانيه معاكي في المنافسه
-------------------------------------------
يا شباب انا اسفه طولت عليكم واكيد كلامي مش لكل واحد فيكم .. انا عارفه ان في ناس كويسه اوي وعارفه يعني ايه تحب وازاي تحب وازاي تحافظ علي ده الحب
فياريت اللي يحس كلامي اللي قلته
يراجع نفسه
افتكر انت زعلتها اخر مره ليه
وروح صالحها
واوعدها انك مش حتزعلها تاني
اتناقش معاها واتكلم
واعترف بذكائها
حافظ علي شخصيتها
انسي سي السيد
سي السيد كان زمان ايام مكنش في منافسه
دلوقتي المنافسه جامده جدااااااااااااااااااااااا واللعب كله عالمكشوف
حاول بجد تحافظ علي مكانتك في قلبها وخليك انت المنافس الوحيد[i][b]
موضوع: موضوع للنقاش تنافس الحب 
الجمعة مارس 05, 2010 5:25 pm